अल्पवयीन मुलीचा मृत्यू

इंदापूर: विनयभंग केल्यानंतर कीटकनाशक पाजण्यात आलेल्या अल्पवयीन मुलीचा अकलूज येथील खासगी रुग्णालयात उपचार सुरू असताना बुधवारी (दि.३१) सकाळी मृत्यू झाला. याप्रकरणी रणजीत दाजी जाधव (वय २७, रा. सराटी, ता. इंदापूर) यावर खुनाचा गुन्हा दाखल झाला.

२८ जुलैला विनयभंगाचा गुन्हा दाखल झाल्यानंतर दुसऱ्याच दिवशी त्याला इंदापूर पोलिसांनी अटक केली होती. याप्रकरणी न्यायालयात हजर केले असता १ ऑगस्टपर्यंत पोलिस कोठडी सुनावण्यात आली.

याबाबत पोलिसांनी दिलेली अधिक माहिती अशी की, वकीलवस्ती (ता. इंदापूर) येथे रविवारी (दि.२८) रोजी दुपारी दीड वाजण्याच्या सुमारास अल्पवयीन मुलगी एकटीच घरी असताना ती शिकत असलेल्या शाळेतील लिपिक असणारा रणजीत जाधव घरी येऊन विनयभंग करत शरीरसुखासाठी बळजबरी करू लागला. ती प्रतिकार करू लागल्याने त्याने, खिडकीमध्ये ठेवलेली शेतीसाठी वापरण्यात येणाऱ्या कीटकनाशकाच्या बाटलीचे टोकन काढून तिच्यातील औषध त्या मुलीला पाजले. ती आरडाओरडा करताच तिच्या आजोबांनी बाहेरून दरवाजा वाजवला, त्यानंतर आरोपी जाधव याने दरवाजा उघडुन मुलीच्या आजोबांना ढकलून तो पळून गेला. पीडितेवर अकलूज येथील खासगी रुग्णालयात उपचार सुरू असताना तिचा मृत्यू झाला.