पुणे–सोलापूर संयुक्त महाराष्ट्र सोशल मिडीया मेळावा : पूर्वतयारी सुरू; सामाजिक न्याय व डिजिटल सक्षमीकरणावर भर

पुणे | प्रतिनिधी | दि. 6 जानेवारी 2026

महाराष्ट्र सोशल मीडिया संघटनेच्या वतीने पुणे व सोलापूर जिल्ह्यांचा संयुक्त सोशल मिडीया मेळावा एकाच ठिकाणी आयोजित करण्याच्या दृष्टीने सध्या पूर्वतयारी व संघटनात्मक नियोजन सुरू असल्याची माहिती देण्यात आली आहे. ही माहिती सूचनात्मक व पूर्वनियोजन स्वरूपाची असून, अंतिम कार्यक्रमाची तारीख व ठिकाण लवकरच जाहीर करण्यात येणार आहे.

या प्रस्तावित संयुक्त मेळाव्याचा मुख्य उद्देश समाजातील विविध घटकांना न्याय मिळवून देण्यासाठी माहिती व संवादाचे प्रभावी माध्यम निर्माण करणे, शासनाच्या विविध योजनांची माहिती समाजाच्या तळागाळापर्यंत पोहोचवणे तसेच समाजाला डिजिटल युगाबरोबर योग्य पद्धतीने पुढे नेण्याची दिशा देणे हा आहे.

संघटनेच्या माहितीनुसार, डिजिटल युगात वाढणाऱ्या आव्हानांच्या पार्श्वभूमीवर डिजिटल साक्षरता, सुरक्षितता व जागरूकता यावर विशेष भर दिला जाणार असून, नागरिकांचे होणारे डिजिटल शोषण कसे थांबवता येईल, याबाबत सकारात्मक व मार्गदर्शक भूमिका मांडली जाणार आहे. सोशल मीडियाचा जबाबदार व समाजहिताचा वापर कसा करता येईल, यावरही सखोल चर्चा होणार आहे.

या संयुक्त मेळाव्यात महाराष्ट्र सोशल मीडियाची कार्यपद्धती, संघटनात्मक रचना, जबाबदारीचे स्पष्ट नियोजन आणि पुढील वाटचाल याबाबत सुस्पष्ट दिशा निश्चित केली जाणार आहे. “फुल नाही तर फुलाची पाकळी” या भावनेतून संघटनेच्या प्रत्येक पदाधिकारी व कार्यकर्त्याला काम देऊन सक्रिय सहभागी करून घेण्याचे नियोजन करण्यात आले आहे.

संघटनेच्या वतीने या मेळाव्यास राजकीय, सामाजिक, सांस्कृतिक, चित्रपट तसेच इतर क्षेत्रांतील मान्यवरांना आमंत्रित करण्यात येणार असून, त्यांच्याशी महाराष्ट्र सोशल मीडियाच्या संघटनात्मक कार्यपद्धती, सामाजिक भूमिका आणि डिजिटल युगातील संघटनेची पुढील वाटचाल याबाबत संवाद साधण्यात येणार आहे.

दरम्यान, या पूर्वतयारीच्या टप्प्यात पुणे व सोलापूर जिल्ह्यातील सर्व तालुका व जिल्हास्तरीय पदाधिकाऱ्यांना सदस्य नोंदणी, संघटनात्मक कामकाज व डिजिटल उपक्रमांमध्ये सक्रिय राहण्याचे स्पष्ट निर्देश देण्यात आले आहेत. दिलेली जबाबदारी जाणीवपूर्वक टाळणारे, निष्क्रिय राहणारे किंवा कोणतीही कार्यपावती न देणारे पदाधिकारी यांच्याविरोधात जबाबदारी काढून घेणे, पदावरून मुक्त करणे अथवा आवश्यक ती शिस्तभंगाची कारवाई केली जाईल, अशी ताकीदही संघटनेने दिली आहे.

ही माहिती पूर्वतयारी व नियोजनाच्या अनुषंगाने देण्यात येत असून, संयुक्त मेळाव्याची अंतिम तारीख व ठिकाण अधिकृत माध्यमांद्वारे स्वतंत्रपणे जाहीर करण्यात येईल, असे संघटनेने स्पष्ट केले आहे.

शिरीष कादबाने, प्रभारी अध्यक्ष, महाराष्ट्र सोशल मिडीया (महाराष्ट्र राज्य) यांनी या संयुक्त मेळाव्याच्या माध्यमातून महाराष्ट्र सोशल मीडियाची सामाजिक न्याय, शासन–समाज दुवा, डिजिटल सक्षमीकरण आणि संघटनात्मक बळकटीकरण ही भूमिका अधिक प्रभावी होईल, असा विश्वास व्यक्त केला आहे.

अधिक माहितीसाठी संपर्क :
Website : www.msmlive.in
Email : msmlive24@gmail.com
Contact : 9527817676 / 9763626288