इंदापूर तालुक्यात अवैध धंद्यांचा सुळसुळाट! दारू आणि मटका राजरोसपणे सुरू; पोलीस प्रशासन झोपेत की 'अर्थ'पूर्ण पाठबळ?

इंदापूर (विशेष प्रतिनिधी, महाराष्ट्र सोशल मीडिया):

इंदापूर शहर आणि ग्रामीण भागात सध्या अवैध धंद्यांनी सीमा ओलांडली असून, दारू आणि मटक्याचे अड्डे राजरोसपणे सुरू असल्याचे विदारक चित्र समोर आले आहे. एकीकडे कायदा व सुव्यवस्था राखण्याची जबाबदारी असलेल्या पोलीस प्रशासनाचे याकडे अक्षम्य दुर्लक्ष होत असल्याने, "पोलीस नक्की काय करत आहेत?" असा संतप्त सवाल सर्वसामान्य नागरिकांमधून उपस्थित केला जात आहे. की या पाठीमागे दरमहा मिळणारे 'हप्ते' कारणीभूत आहेत? अशी उघड चर्चा आता तालुक्यात रंगू लागली आहे.

गल्लीबोळात मटका आणि दारूचे अड्डे; तरुण पिढी उद्ध्वस्त!

मिळालेल्या माहितीनुसार, इंदापूर तालुक्यातील अनेक गावांमध्ये आणि मुख्य चौकांमध्ये छुप्या आणि काही ठिकाणी उघडपणे मटक्याचे आकडे घेतले जात आहेत. तसेच विनापरवाना देशी-विदेशी दारूची विक्री जोरात सुरू आहे. या अवैध धंद्यांमुळे अनेक हसतीखेळती कुटुंबे उद्ध्वस्त होत असून, तरुण पिढी व्यसनाच्या आहारी चालली आहे. भरचौकात चालणाऱ्या या धंद्यांमुळे महिलांच्या सुरक्षेचा प्रश्नही ऐरणीवर आला आहे.

पोलीस प्रशासनाचा ढिसाळ कारभार की 'अर्थ'पूर्ण डोळेझाक?

अवैध धंद्यांची माहिती स्थानिक पोलिसांना नसते असे म्हणणे म्हणजे हास्यास्पद ठरेल. मग प्रश्न असा पडतो की, कारवाई का होत नाही?

जनतेचा थेट सवाल: कारवाईच्या नावाखाली फक्त किरकोळ गुन्हे दाखल करून मूळ चालकांना अभय दिले जात आहे का?

हप्तेखोरीची चर्चा: खाकी वर्दीच्या आशीर्वादानेच हे अड्डे राजरोसपणे चालवले जात असल्याचा संशय नागरिकांना येत आहे. महिन्याला मिळणाऱ्या 'हप्त्या'पोटी पोलीस प्रशासन या गंभीर बाबीकडे जाणीवपूर्वक डोळेझाक करत असल्याचा थेट आरोप आता होऊ लागला आहे.

"तालुक्यात गुन्हेगारी आणि अवैध धंदे वाढले की त्याचा थेट फटका सामान्य जनतेला बसतो. पोलीस प्रशासनाने यावर तात्काळ कठोर पावले उचलली नाहीत, तर 'महाराष्ट्र सोशल मीडिया' जनतेच्या हक्कासाठी प्रशासनाला जाब विचारल्याशिवाय राहणार नाही."

वरिष्ठ अधिकारी दखल घेणार का?

इंदापूर तालुक्यातील या वाढत्या अवैध धंद्यांवर आता जिल्हा पोलीस प्रमुखांनीच थेट लक्ष घालण्याची वेळ आली आहे. स्थानिक पोलिसांना पाठीशी न घालता, या अड्ड्यांवर धाडी टाकून ते कायमचे उद्ध्वस्त करावेत, अशी मागणी जोर धरत आहे.

आता या बातमीची दखल घेऊन इंदापूर पोलीस प्रशासन जागे होणार की अवैध धंदे चालकांचे 'अर्थ'पूर्ण संबंध असेच कायम राहणार? याकडे संपूर्ण तालुक्याचे लक्ष लागले आहे.

- ब्युरो रिपोर्ट, महाराष्ट्र सोशल मीडिया.