हर्षवर्धन पाटील यांचेकडून वडापुरी येथील जनावरांच्या जळीतग्रस्त गोठ्याची पाहणी

इंदापूर: प्रतिनिधी अहमद शेख

वडापुरी येथील जनावरांच्या जळीतग्रस्त गोठ्याची भाजप नेते व माजी मंत्री हर्षवर्धन पाटील यांनी सोमवारी (दि.8) सायंकाळी पाहणी केली.

अवसरी रस्त्यावर असलेल्या गोविंद बाळासाहेब निंबाळकर या शेतकऱ्याच्या जनावरांच्या गोठ्यास रविवारी दुपारी शॉर्टसर्किटमुळे आग लागल्याने गोठा जळून 4 गाई मृत्युमुखी पडल्या तर इतर 3 जनावरे जखमी झाली आहेत.

यावेळी घटनास्थळावरून हर्षवर्धन पाटील यांनी महसूल, वीज मंडळ, जिल्हा परिषद, पंचायत समितीच्या तालुक्यातील व जिल्ह्यातील वरिष्ठ अधिकाऱ्यांशी फोनवरून संपर्क करून जनावरे मृत झाल्याने गोविंद निंबाळकर यांना तातडीने शासकीय मदत व सहकार्य करण्याच्या सूचना केल्या, त्या अधिकाऱ्यांनी मान्य केल्या. तसेच यावेळी हर्षवर्धन पाटील यांनी आर्थिक मदत करण्याचे जाहीर केले.

या भेटीप्रसंगी नीरा-भीमा कारखान्याचे संचालक दत्तात्रय शिर्के, राजेंद्र पाटील, बापू चंदनशिवे, धनाजी जाधव, घन:श्याम थोरात, राजेंद्र देवकर, विठ्ठल पिंगळे, निजाम शेख, किशोर फडतरे, उमेश यादव, किरण शिर्के, सुरेश यादव, पशुधन अधिकारी पशुधन अधिकारी डॉ.बी.एस. घुगे व शेतकरी उपस्थित होते.